ಮರೀಚಿಕೆ

ನಿನಗಾಗಿ ಹಂಬಲಿಸಿದೆ ನೀ ಬಂದು ನನ್ನ ಸೇರಿದಾಗ
ಎನು ಮಾಡಲೆಂದು ತಿಳಿಯದೆ ಚಡಪಡಿಸಿದೆ

ನೀನು ಸಿಕ್ಕರೆ ಬಾಳು ಸಕ್ಕರೆ ಜೀವನವೆಲ್ಲಾ ಅಕ್ಕರೆ
ಎಂಬ ಕನಸ ಕಂಡೆ ನೀ ಜೊತೆಯಾದ ಬಳಿಕ
ನಿನ್ನ ಪಡೆಯಲು ಪಟ್ಟ ಕಷ್ಟಗಳ ಸರಮಾಲೇಯೇ
ಮಧುರವೆನಿಸುತಿದೆ

ಕಂಡ ಕಂಡ ದೇವರಲ್ಲಿ ನಿನಗಾಗಿ ಹರಕೆ ಹೊತ್ತೆ
ಉಳಿದೆಲ್ಲ ಸುಖವ ಕಡೆಗಾಣಿಸಿ ನಿನಗಾಗಿ ಹಾತೊರೆದೆ
ಇಂದು ನೀ ಜೊತೆಗಿರಿ ನೆಮ್ಮದಿ ಸುಖ
ಹಗಲುಗನಸಾಗಿದೆ

ಒಂದು ಮುಸ್ಸಂಜೆ

ಮುಸ್ಸಂಜೆಯ ತಂಗಾಳಿ ಸುಮಗಂಧ ಪಸರಿಸಿರೆ
ನದೀ ತೀರದಿ ನೀ ನನ್ನ ಬೆನ್ನಿಗಾತು ಕುಳಿತಿರೆ
ಇಳಿದಿತ್ತು ನಾಕವೇ ಭುವಿಗೆ ಮರೆಸಿತ್ತು ಇಲ್ಲಿನ ನರಕ

ಗೋವುಗಳ ಮಂದೆ ಊರಿನೆಡೆ ಸಾಗುತಿರೆ
ಕೊರಳ ಗೆಜ್ಜೆಯ ನಿನಾದ ಕಿವಿಯಲ್ಲಿ ಹಾಡುತಿರೆ
ನಿನ್ನ ಇನಿದನಿಯ ಮಾತು ಸುಮಧುರ ಸಂಗೀತ
ಹಕ್ಕಿಗಳ ಇಂಚರವೇ ಅದಕೆ ತಾಳ ಮೇಳ

ಪಡುವಣದಿ ಸೂರ್ಯ ಆಗಸದಿ ಕೆಂಪು ಹರಡಿರೆ
ನಿನ್ನ ಮೊಗದ ಕೆಂಪು ಅದರೊಡನೆ ಮಿಳಿತವಾಗಿರೆ
ಆವರಿಸುತ್ತಿದ್ದ ಕತ್ತಲಿಗೆ ನಿನ್ನ ಕಣ್ಣು ಮಿನುಗುತಿರೆ
ನನ್ನ ನಾನೇ ಮರೆತು ನಿನ್ನೊಳಗೆ ಸೇರಿದ್ದೆ