ಕನಸುಗಳು

ಕನಸುಗಳ ಮಾರುವ ಊರಿಗೆ ಬನ್ನಿ
ಅಲ್ಲಿ ಸಂತೆಯಲ್ಲಿ ಕುಳಿತಿದ್ದಾನೊಬ್ಬ ಸಂತ

ಕೊಳ್ಳುತ್ತಿದ್ದಾರೆಲ್ಲ ಬಣ್ಣಬಣ್ಣದ ಕನಸುಗಳ
ಇವ ಮಾತ್ರ ನಗುತ್ತಿದ್ದಾನೆ ಎಲ್ಲರ ಅವಸರ ನೋಡಿ
ಇಂದಿರುವುದು ನಾಳೆಯಿಲ್ಲ ನಾಳೆಯೆಂಬುದ ಕಂಡವರಿಲ್ಲ
ಆದರೂ ಕನಸುಗಳ ಮಾರಟಕ್ಕೆ ಧಕ್ಕೆ ಇಲ್ಲ

ಒಂದು ದಿನ ಬದುಕು ಬದಲಾಗಿ ಬಂಗಾರವಾಗುತ್ತದೆ
ಈ ಕನಸನ್ನು ಜನ ಹರಾಜಲ್ಲಿ ಕೂಗುತ್ತಿದ್ದಾರೆ
ಒಂದೇ ಬಾರಿ ಆ ಚೆಲುವೆ ನನ್ನವಳಾಗಲೆಂಬ ಕನಸಿಗೆ
ಎಲ್ಲಾ ಪ್ರಾಯದವರು ಸರದಿಯಲ್ಲಿ ಕಾಯುತ್ತಿದ್ದಾರೆ

ಮನಸ್ಸಿನ ಬಾವನೆಗಳ ಮುಚ್ಚಿಟ್ಟುಕೊಂಡು
ಬದುಕುತ್ತಿರುವ ನಮಗೆಲ್ಲಾ ಬದುಕುವ ಭರವಸೆ ಈ
ಕನಸುಗಳು ನನಸಾದರೆ ಕಲ್ಪನೆಗೂ ವಾಸ್ತವಕ್ಕು
ಆಗುವ ತಾಕಲಾಟದ ನೋವು ಯಾರಿಗೆ ಬೇಕು